A través da web da Federación Hípica Española, Equiocio vén de abrir o prazo de inscricións no Concurso Nacional de Saltos (CSN***) Cidade de Ferrol que, como ocorrera o pasado ano, será a única proba desta categoría programada no calendario de competición de Galicia en 2023. Celebrarase do 4 ao 6 de agosto no Campo das Cabazas-Covas (Ferrol) coa vista posta en manter os rexistros do pasado ano, e situarse como o concurso que congrega unha maior participación en Galicia e o Norte de España durante todo o ano.
Repartiranse máis de 18.000 euros entre os primeiros clasificados nas diferentes competicións, e haberá ata 13 probas diarias a disputar, con alturas entre os 0,50 m e os 1,40 m. Para esta edición, o comité organizador ten preparado unha pista principal de herba cunhas dimensións de 70×50 metros, namentras que a de ensaio volverá ser de area, cunhas dimensións de 50×25 e unha distancia a cuadras de 30 metros.
Así mesmo, a organización avanza que o próximo mes de xullo abrirase tamén a inscrición na Copa de España de Campeóns de Ponis e na Competición autonómica CST (Concurso de Saltos Territorial), do que se informará coa antelación suficiente
Equiocio 2023 conta co respaldo, entre os seus principais patrocinadores, do Concello de Ferrol, Deputación provincial da Coruña, Xunta de Galicia, Gadis e Estrella Galicia.
