A programación do Ecomarket, o mercado de marcas sostibles e de proximidade de Equiocio Ferrol (Covas, do 1 ao 4 de agosto), completarase por segundo ano con distintos obradoiros. Propostas sobre reciclaxe, reutilización e outras de corte creativo como as que porá en marcha o estudio cerámico La Barroteka. Uns obradoiros gratuítos, que tiveron unha excelente acollida na pasada edición, para os que se abre o prazo de inscrición.
No marco das actividades sostibles, que promociona Sogama, inclúense estes obradoiros a través dos que o público que visite o certame hípico e de lecer familiar poderá aprender diferentes técnicas de modelado para crear as súas propias pezas de arxila, tipo cunco, cunco ou floreiro. Creacións que poderán despois levar para casa e utilizar con fins decorativos.
As persoas que queiran probar a experiencia de modelar o barro poderán asistir a calquera dos tres talleres, de hora e media de duración, que se realizarán no certame. Terán lugar o venres, ás 11:30 e máis ás 18.30 horas, e tamén o sábado, a partir das 11.30 h. A organización facilitará os materiais e ferramentas de traballo.
As persoas interesadas deberán inscribirse nas redes sociais de @labarroteka, no teléfono 679506950, ou no correo equiociocomunicacion@gmail.com. As prazas son limitadas.
Máis talleres
A iniciativa forma parte da programación de actividades sostibles que desenvolve Equiocio Ferrol co apoio de Sogama. Un catálogo de accións que incluirá todas as tardes obradoiros ben de reciclaxe creativo. As propostas variarán segundo a xornada e, arrancarán o xoves da man de Capuchino Parque Infantil, coa actividade “Reciclando con Mickey Mouse” destinada a customizar, coa axuda desta personaxe, camisetas que xa non usan para darlles unha segunda vida.
Equiocio Ferrol ultima xa a súa edición número 33, na que volverá contar como principais patrocinadores coa Xunta de Galicia, Concello de Ferrol, Deputación da Coruña, Gadis e Estrella Galicia.
